Тукай рухы яшәгән як: Арча районы кунаклар каршы алырга әзерләнә

Нәкъ бер айдан - апрельнең ахыргы якшәмбесендә без Габдулла Тукайның 140 еллыгын билгеләп үтәчәкбез. Республика Рәисенең юбилей тантаналарын уздыру буенча махсус указы бар. Анда "шагыйрьнең илебез мәдәниятенә керткән гаять зур өлешен исәпкә алып, аның 140 еллыгын билгеләп үтәргә карар бирәм" диелә. Шулай ук, Бөтендөнья татар конгрессы 2026ны Габдулла Тукай елы дип игълан иткән иде.

Тукайның татар халкы үзаңы үсешенә керткән өлеше турында без, әлбәттә, көн саен уйланмыйбыз. Әмма аның классик әдип буларак, һәр чор өчен әһәмиятен югалтмый торган мәңгелек әсәрләре бар. Әгәр дә янәшәбездә милли хисләр белән уйный башлыйлар икән, без аның "Милләткә "шигырен тел очында әйләндерәбез. "Бар уем кичен-көндезен сезнең хакта, милләтем, саулыгым - минем саулык, авыруың - минем авыруым". Күңелебезне җирсү хисләр биләп алса, "Тау башына салынгандыр безнең авыл, бер чишмә бар, якын безнең авылга ул", дибез. Сагышланган мизгелләрдә "Милли моңнар"ны сузабыз: "Ишеттем мин кичә берәү җырлый, чын безнеңчә матур, милли көй".

Бүгенге репортажыбыз Тукайны моңландырган һәм илһамландырган туган ягыннан булачак. Арча районы кунаклар кабул итәргә әзерләнә. Кушлавыч белән Кырлайда музей, елга яр буе, Сәгъди абзый утары төзекләндерелә. Өр-яңа "Шүрәле" паркы төзелә. Алия Хәйретдинова репортажы.