Казанда туган тел һәм әдәбияты укытучыларының «Туган тел» Бөтенроссия конкурсы уза

27нче татар гимназиясе базасында туган тел һәм әдәбият укытучыларының «Туган тел» Бөтенроссия мастер-классының йомгаклау этабы үткәрелә. Конкурста җиңүчеләрне бүләкләү тантанасы 1 апрельдә 9.00 сәгатьтә гимназиядә узачак. Бу хакта Татарстан Мәгариф министрлыгы матбугат хезмәте хәбәр итә.

Туган тел һәм әдәбият укытучыларының «Туган тел» Бөтенроссия мастер-классы заманча тел белеме бирү сәясәтен гамәлгә ашыру механизмнарының берсе булып тора. Ул федераль законнар, Россия Федерациясе дәүләт милли сәясәте стратегиясе белән билгеләнгән.

Конкурс «2014-2020 елларга Татарстан Республикасы дәүләт телләрен һәм Татарстан Республикасында башка телләрне саклау, өйрәнү һәм үстерү» дәүләт программасын тормышка ашыру кысаларында һәм Татарстан Республикасы Мәгариф һәм фән министрлыгының 2019-2020 уку елына эш планы нигезендә үткәрелә.

Конкурсның төп максаты - Россия Федерациясе һәм Татарстан Республикасы халыкларының тел һәм мәдәни күптөрлелеген саклауга һәм үстерүгә ярдәм итү, туган тел укытучыларының дәрәҗәсен күтәрү, педагогик тәҗрибәне һәм һөнәри осталыкны тарату.