Төмән китапханәсендә татар әдәбияты фонды ачылды

Төмән шәһәре китапханәләренең берсендә әлегә бердәнбер булган татар әдәбияты фонды ачылган. Бу хакта “Урал татарлары” сайты хәбәр итә.

Төмән шәһәренең 18нче китапханәсендә ачылган татар әдәбияты фонды шәһәрдә әлегә бердәнбер. Биредә фондны тулыландыруда Казаннан, Бөтендөнья татар конгрессы башкарма комитеты рәисе Ринат Закировның хезмәте зур булган.

Хәзерге вакытта фондта 550 данә китап бар. Алар арасында нәфис һәм фәнни әдәбият, Татарстан төбәкләре турында басмалар бар. Татар әдәбияты классиклары Г. Тукай, Г. Толымбай, Ә. Еники, Х. Такташ, М. Җәлил, шулай ук Ф. Яруллин, М. Галиев, Л. Шакирҗанова әсәрләре дә урын алган.

Төрле тармак буенча: тарих, философия, дин, генеалогия, мифология һәм татар халкы мәдәнияте турында да шактый китаплар, сүзлекләр тупланган.

Китапханә хезмәткәрләре татар һәм рус телендәге китапларны өй китапханәсеннән кабул итәргә әзер булуларын җиткерәләр.

("Татар-информ")