Кыш бабай һәм Кар кызын чакыру күпмегә төшә?

Без барыбыз да Яңа елдан могҗиза көтәбез. Менә киләсе ел безгә әллә нинди күңелле мизгелләр бүләк итәр, матур яңалыклар алып килер, яхшы хәбәрләр ирештерер, узган елда булган борчу-мәшәкатьләребез коелып төшеп калыр төсле. Яңа ел белән, әлбәттә инде, Кыш бабайдан матур теләкләр һәм бүләкләр дә көтәбез.

Элегрәк, без кечкенә вакытта, Кыш бабай белән Кар кызын балалар бакчасында, мәктәптә узган чараларда яки клубтагы Яңа ел бәйрәмендә генә күрә идек. Хәзер исә, теләгең һәм мөмкинлегең булса, бәйрәмнең иң көтеп алынган кунагы һәр кешенең өенә барып котлый. Әлбәттә, үз акчагызга. Хәзерге вакытта әти-әниләр, балаларының күңелен күрер өчен, Кыш бабай белән Кар кызын чакыру көнен билгеләү белән мәш килә. «Шәһри Казан» газетасы хәбәрчесе дә аларны чакыру шартлары һәм бәяләр белән кызыксынды.

«Безне инде көтәләр»

Журналист, «Болгар радиосы» сайты баш мөхәррире Эльвира Шакирова белән «Идел» журналы баш мөхәррире Радик Сабиров Кыш бабай һәм кар кызы ролендә быел өченче ел балаларның күңелләрен күрәчәк. Башкалардан аермалы буларак, алар корпоративларга һәм балалар бакчасында уза торган чыршы бәйрәмнәренә йөрми. Фәкать өйләргә генә бара.
– Быел Кыш бабай белән Кар кызы булып йөрмикме әллә, дип тә уйлаган идек, тик алдагы елларда булган клиентларыбыз чакыра, көтә. Көздән үк шалтыратып белешеп куючылар бар хәтта, – диде Эльвира.

Кыш бабай белән Кар кызының программасы 20-30 минутка сузыла. Бу вакыт эчендә алар балалар белән аралаша, уеннар уйната, шигырьләр сөйләтә яки җырлата, бүләкләр бирә.
– Башкалар белән аралашкан вакытта, үзебезнең бәяләрнең бик кыйммәт булмавын аңлыйм. Безнең кебек программа өчен 4-5 мең сораучылар да бар. Узган ел 1700 сумнан башланган иде. Быел иң арзан чакыру – 1900 сум. Яңа елга якынлашкан саен, иң кыйммәте 3000 сум булачак, – диде ул.
Заказлар кабул итә башлаганнар инде. Беренче клиентларына 22 декабрьдә барачаклар. Эштән соң гына йөргәч, алар көненә икедән алып алтыга кадәр кешедә булып өлгерә. Аларның клиентлары арасында җырчылар да күп. Эльвира әйтүенчә, Кыш бабай гадәти түгел, ә милли. Аның киемнәренә дә татар орнаментлары чигелгән.

– Минем Кыш бабайның сөйкемле сөяге бар. Ул балалар белән бик тиз уртак тел таба, алар да аңа тартыла. Кыр кызы булып йөрүдән керем бар – яшермим. Мин инде ике ел шул акчага Яңа елда мул итеп табын корам. Киемнәрне дә шунда эшләп җыйган акчага яңартам. Быел менә тагын яңа костюм алырга телим, – диде Кар кызы.

Кыш бабай – халык артисты

Кыш бабай булып танылган артистлар да йөри. Әгәр балагызны Татарстанның халык артисты Азат Тимершәех котларга килсә, аптырап калмагыз. Азат әфәнде әйтүенчә, ул бу эшкә күптәннән – 1980 елларда ук алынган. Еш кына балалар бакчаларына, өйләргә бара икән. Кыш бабайның оныгы – Кар кызы булып театр актрисалары йөри. Бу тандемнарның үзенчәлеге – үзләре белән баянчылары да бар.
– Бу кәсебемне кешегә шатлык китерү, балаларның күңелен күрү дип кабул итәм. Аларның сөенүләрен күреп, үземә дә рәхәт була. Ярый әле, балалар могҗизага ышана. Аннан соң татар телен саклап калуның бер ысулы да дип саныйм эшемне. Ә үземнең алты оныгым, Кыш бабайны күргәч: «Бу безнең бабай бит!» – дип көлә, – ди ул.

Азат Тимершәех, клиентларга төгәл бәясен әйтмим, ди.
– Алдан ук: «Никадәр булдыра аласыз, шуның кадәр бирерсез», – дип әйтәм. 1000 сум бирүчеләр дә, 1500, 1800 сумнарын кызганмаучылар да бар. Никадәр бирәләр, шуңа ризамын. Без, элеккеге буын җырчылары, бәя сорап ала белмибез шул. Балалар бакчаларында 1500-2000 сум бирәләр. Белдерүләр дә элгәнем юк. Бер кеше икенчесенә әйтеп чакыралар. Иң күбе – бер көнгә 28 заказ булган иде. Бик күп инде ул. Бик арыта да. Узган ел бер көнгә 15 заказ кабул иткән идем, – диде Азат әфәнде.

("Шәһри Казан")