Мәгариф министрлыгында балалар бакчасы өчен түләүнең арту сәбәпләрен атаганнар

2025 ел башыннан балалар бакчасы өчен түләүнең сигез процентка артуы, шул исәптән, туклану кыйммәтләнү белән дә бәйле. Бу хакта «Татар-информ»га Татарстан Республикасы Мәгариф һәм фән министрлыгында хәбәр иткәннәр.

«2025 елның 1 гыйнварыннан республика бакчаларында баланы караган өчен түләү сигез процентка арта. Түләү арту мәктәпкәчә белем бирү оешмасы эшчәнлеген финанс яктан тәэмин итүгә чыгымнар арту белән бәйле. Шул исәптән туклануны оештыруга чыгымнар арту белән дә», - дип хәбәр иткәннәр ведомство матбугат хезмәтендә.

Татарстанда бакчалар өчен түләү учреждениенең төренә, эш режимына һәм баланың яшенә карап аерыла. Мәсәлән, 3 яшьтән алып 7 яшькә кадәрге бала 10,5 сәгать тора торган гомуми үсеш төркемнәрендә түләү 3732 сумны тәшкил итә. Киләсе елдан ул 310 сумга арта (2024 ел белән чагыштырганда).

Түләү һәм компенсация буенча барлык ташламалар саклана. Әйтик, инвалид балалар һәм ата-ана каравыннан мәхрүм калган балалар бакча өчен түләүдән тулысынча азат ителә. Махсус хәрби операция катнашучылары балалары өчен бакчалар бушлай эшли. Моннан тыш, Татарстанда күп балалы гаиләләр өчен ташламалар бар. Мәсәлән, өч һәм аннан да күбрәк баласы булган ата-аналар билгеләнгән сумманың 50 процентын гына түли.

Бүген иртән билгеле булганча, Татарстанда 2025 елга балалар бакчасы өчен түләүнең максималь күләме расланды.

Фото: ТНВ

Источник: https://tnv.ru/tat/news/fn-m-marif-/417657-m-garif-ministrlygynda-balalar-bakchasy-chen-t-l-ne-artu-...