«Болгар радиосы» мөхәррире Артур Фәләхов «СМИротворец-2026» бөтенроссия бәйгесендә җиңү яулады

Татарстан журналистикасы өчен чираттагы зур горурлык: «Болгар радиосы»ның Яңалыклар хезмәте мөхәррире Артур Фәләхов «СМИротворец-2026» абруйлы бөтенроссия конкурсы лауреаты булды. Ул «Россия халыклары бердәмлеге» номинациясендә мактаулы 2 урынга лаек дип табылды.
Артур Фәләхов быелгы бәйгедә Татарстан данын яклап җиңүгә ирешкән бердәнбер журналист.
Быел «СМИротворец» конкурсында көндәшлек аеруча югары булды. Оештыручылар илнең барлык федераль округларыннан — 1329 массакүләм мәгълүмат чарасыннан һәм популяр блоглардан килгән 14 меңнән артык материалны тикшергән. Катлаулы сайлап алу этапларыннан соң, финал исемлегенә (шорт-листка) нибары 135 катнашучы узды. Ә дәрәҗәле жюри алар арасыннан иң яхшы 35 җиңүчене билгеләде.
Хезмәттәшебезне әлеге зур уңышы белән чын күңелдән котлыйбыз! Бу җиңү — Республикабыз радиожурналистикасының югары дәрәҗәсен һәм милләтара дуслыкны ныгытуга керткән өлешен тагын бер кат раслый.