Казандагы Җанатарлар зонасы киләчәктә дә төрле чаралар уздырганда кулланылачак

“Казан” гаилә үзәге янында урнашкан Җанатарлар зонасын киләчәктә дә төрле чаралар уздырганда файдалану күздә тотыла. Бу хакта бүген IT паркта – дөнья чемпионатының шәһәр матбугат үзәгендә узган матбугат конференциясендә Татарстан Премьер-министры урынбасары Ләйлә Фазлыева әйтте.

Ләйлә Фазлыева бу мәйданчыкның чаралар үткәрү өчен уңайлылыгын билгеләп узды. “Әйтик, киләсе елда анда Яшьләр көнен уздырып булыр иде. Бу мәйданчык инфраструктурасын берничә көнлек чаралар өчен куллану кулайрак булыр иде. Без хәзер бу эш тәҗрибәсен өйрәндек, алга таба, әлбәттә, аны файдаланып булачак”, - дип белдерде ул.

Вице-премьер әйтүенчә, 2019 елда Казанда эшче һөнәрләр буенча дөнья чемпионатын үткәргәндә дә, фан-фест территориясе эшләргә мөмкин.

Казан шәһәре парклар һәм скверлар дирекциясе генераль директоры Алсу Сәетова җанатарлар фестивалендә уникаль инфраструктура булдырылганын һәм аның да зур мирас булып калуын билгеләп узды. Ул 2019 елда "Казан" гаилә үзәге яны территориясенең шәһәр иҗтимагый киңлекләрен үстерү программасына кертеләчәген әйтте. “Электр уты, су белән тәэминат, канализация, сыйфатлы инфраструктура теләсә нинди дәрәҗәдәге чаралар уздыру мөмкинлеге бирә. Фан-фест территориясе 25 мең кеше сыйдырышлы. Киләчәктә ул шәһәр һәм киңкүләм халыкара чараларын уздыру өчен дә кулланылыр дип уйлыйм. Шәһәр көнен дә биредә бәйрәм итәргә мөмкин булыр иде”, - дип белдерде ул.

Алсу Сәетова җанатарлар зонасына илтә торган юлда – “Татмедиа” каршысында төзекләндерү-ямьләндерү эшләре башкарылганын искәртте. “Теләсә нинди яңа иҗтимагый киңлек булдыру ул архитектор, подрядчылар белән дә эшләү. Алар безгә һәр өслекне ничек карап торырга кирәклеген аңлаталар, инструкция бирәләр. Җиргә җәелгән ул брусчатка буенча инструкция бар. Кыштан соң да аны саклап калырга тырышачакбыз. Җитештерүчеләр аны зәвыклы да, чыдам да дип ышандыра”, - диде.

("Татар-информ")