Диния нәзарәте татар теле мөгаллимнәрен туплау эшен төгәлләде

Кичә Татарстан мөселманнары Диния нәзарәте мәчетләрдә татар телен һәм ислам дине нигезләрен укытырга алынган мөгаллимнәрне җыелышка җыйды. 2 февральдән Казанның биш мәчетендә – “Кабан арты”, “Гаилә”, “Тынычлык”, “Әниләр”, “Ярдәм”дә, шулай ук 5 район мәчетендә – Әлмәт, Яшел үзән, Чаллы, Түбән Кама, Алабуга шәһәрләрендә татар теле курслары эшли башлый. Хәзерге вакытта дипломга ия, тәҗрибәле татар теле һәм ислам дине нигезләре мөгаллимнәрен туплау эше төгәлләнде. Җыелышта укучы төркемнәрне туплау, аларны уку-укыту әсбаплары, китаплар, сүзлекләр, язу такталары белән тәэмин итү мәсьәләләре каралды. Бу хакта Диния нәзарәте матбугат хезмәте хәбәр итә.

Татарстан мөселманнары Диния нәзарәтенең фән һәм мәгариф бүлеге мөдире Айдар хәзрәт Карибуллин бер төркемдә кешеләрнең санын 25тән дә арттырмаска тәкъдим итте. Ул курсларның телне башлангыч дәрәҗәдә өйрәнүчеләр өчен оештырырга кирәклеккә басым ясады. "Татар теле курсларын тәмамлап чыкканнан соң мәчетләргә җомгаларга, вәгазьләргә йөрүчеләр саны артачак кына”, – диде мөдир.

Курслар атнасына өч көн – дүшәмбе, чәршәмбе, җомга көннәрендә кичке җидедән тугызга кадәр ике дәрес итеп укытылачак.