Короновирус - Мәскәүдә

Мәскәүдә Италиядән кайткан россияледә короновирус табылганнан соң, тагын 24 кешене тикшерергә дип хастаханәгә салганнар.

Сүз вирус йоктырган ир-атның 6 туганы һәм 5 дусты, шулай ук аның белән бергә рейста булган 13 пассажир турында бара. Әлегә берсендә дә короновирус симптомнары юк. Тагын 83 кеше өйләрендә карантинда булачак.

Мәскәү мэры Сергей Собянин күрсәтмәсе буенча, барлык аэропортларда көчәйтелгән тикшерү режимы кертелгән. Кытай, Иран, Көньяк Корея һәм Италиядән килгән кешеләрне аерым тикшерәләр.  Шәһәр хастаханәләрендә өстәмә урыннар булдырылган, балалар бакчаларында һәм мәктәпләрдә балаларның температурасын көн саен тикшереп торалар, шулай ук метрода да.

Искәртеп үтик, Мәскәүдә короновирус беренче тапкыр ачыкланды. Казанда 3 инфекцияләнгән кеше кала. Алар барысы да йогышлы авырулар хастаханәсендә карантинда. Пациентларның хәле тотрыклы.