“Болгар радиосы” VI Милли музыкаль премиясенә дәгъва кылучы артистлар билгеле

“Болгар радиосы” VI Милли музыкаль премиясенә 33 кеше лаек булыр дип көтелә. Премияне тапшыру тантанасы 2018 елның 8 декабрендә Казанның “Пирамида” концертлар залында узачак, дип хәбәр итә оештыручылар.

Быел номинантлар арасында Айдар Галимов, Зәйнәб Фәрхетдинова, Винера Ганиева, Ришат Төхвәтуллин, Илсөя Бәдретдинова, Ләйсән Гыймаева, Лилия Гиматдинова, Идрис Газиев, Илназ Баһ, Айгөл һәм Ришат Шәйхетдиновлар, ИлСаф, Филүс Каһиров, Раяз Фасыйхов, Лилиана Ирназарова, Зинира һәм Ризат Рамазановлар, Дилә һәм Булат Нигъмәтуллиннар, Илмира Нәгыймова һәм Руслан Кираметдинов һ.б бар.

“Болгар радиосы” концертлары продюсеры Ленар Кашафетдинов артистларның, елдагыча, “Тамашачы мәхәббәте”, “Иң моңлы җырчы”, “Елның гаилә дуэты” һәм башка номинацияләрдә бүләкләнәчәген әйтте. "Ә иң мөһим һәм әһәмиятле номинация – “Татар эстрадасы легендасы”. Аны тамашачы аеруча көтеп ала”, - дип сөйләде ул.

Ул “Болгар радиосы” Милли музыкаль премиясе лауреатларының, беренчедән, “Кайнар хит” проекты аша тамашачы тавыш бирү нәтиҗәсендә сайлап алынуын әйтте. “Икенчедән, ел дәвамында “Болгар радиосы”нда еш соралган һәм халык күңеленә кергән җырлар бүләкләнә. “Болгар радиосы” Милли музыкаль премиясенә җырчылар гына түгел, җырны иҗат иткән авторлар да лаек булачак”, - диде Кашафетдинов.

“Болгар радиосы” Милли музыкаль премиясенең максаты – халык күңелен яулаган җырларны барлау, аларны “Алтын йолдыз” сыны белән бүләкләү, җырчыларны һәм аларның иҗат җимешләрен алтын фондка кертү.

("Татар-информ")