“ТНВ”га “Җырлыйк әле” кире кайта

Озакламый “ТНВ” каналына татар халкының яраткан тапшыруы кире әйләнеп кайта. Халыкның күпсанлы сораулары ишетелми калмады. 31 декабрьдә тамашачылар яраткан тапшыруын   “Җырлыйк әле”не кабат каналыбызда күрә алачак.

Берникадәр вакытка ябылып торган тапшыру киләсе сезонда бик җитди үзгәрешләр кичерәчәк. Беренче чиратта,  аның форматы үзгәрәчәк. Моңарчы тапшыруда 10 кеше катнашкан булса, яңа сезонда 3 катнашучы булачак һәм 3 этаптан торачак. “Җырлыйк әле” уен формасында барачак. Тапшыруда катнашучыларның  татар җыр сәнгате өлкәсендәге белеменә бәя бирелә торган булачак. Баллар санына карап, тапшыруның җиңүчесе дә ачыклана торган булачак. “Җырлыйк әле”нең студиясендә  дә бик нык үзгәрешләр барлыкка килүе каралган. Җырларга әзерләнгән видеосюжетны карар өчен экран барлыкка киләчәк.

“Җырлыйк әле” нең йөзе дә үзгәрүе көтелә. Тапшыруның яңа сезоның яшь гаилә Алинә һәм Азат Кәримовлар  алып барачак.

Җырларга яраткан  кеше өчен хис-кичерешләре белән уртак­лашу –бәхет. “Җырлыйк әле” тапшыру ярдәмендә күп кенә кеше әлеге хыялын чынга ашырып, тамашачы алдында осталыгын күрсәтә алачак.

Тапшыруда исә, халык җырларын һәм элегрәк популяр булган, ретро җырларны яңадан ха­лыкның исенә төшерә торган җырлар урын алачак. Әлбәттә, катнашучылар программада фонограммасыз чыгыш ясый торган булачак.  Моннан кала, уен кораллары ансамбленә тере тавыш белән кушылып җырлау да булачак.

«Җырлыйк әле»дә тагын нинди яңалыклар көтелә икәнлеген белергә теләсәгез, тапшыруны 31 декабрьдә 20.30“ТНВ” каналында һәм 20.10“ТНВ-планета” каналында карарга онытмагыз!