Зөлфия Гыйлметдинова декрет ялыннан эшкә чыкты!

“Болгар радиосы”ның “Яңалыклар” алып баручысы Зөлфия Гыйлметдинова декрет ялын төгәлләп эшкә чыкты.

“Болгар радиосы”нда 2006 елдан бирле эшлим. Ул вакытта журналистика факультетында дүртенче курста укый идем. Эфирда яңалыклар укудан тыш, “Әдәби мәйдан” дип исемләнгән тапшыру алып бардым. 2016 елда шушы тапшыру белән “Бәллүр каләм” премиясенә ия булдым. Шул ук елны декрет ялына киттем. Беренче декреттан соң ярты ел эшләгәч, янә декретка китәргә туры килде. Һәм менә, ниһаять, мин яраткан эшемә кайттым.

Башлаган елларда яшьлек беләнме икән, көннәр буе радиода утыра идек. Ул вакытта акчасы да алай ук мөһим түгел иде. Ә хәзер гаилә булгач уйландыра, чөнки сер түгел, ял көннәре дә эштә үтәргә мөмкин. Ләкин күңелемә бик ошый, радио үзенә тарта. Мондый җитәкчелекне һәм коллективны тагын каян табармын дип тә уйлыйм. Эшкә килүемнең икенче көнендә үк туры эфирга чыктым”, - дип сөйләде Зөлфия Гыйлметдинова.