"Сагыну" флешмобы дәвам итә...Сездән килгән хатлар.

Ә миңа Әлфия Авзалова болай истә калган:

Мин бәләкәй чакта безнең өйнең түр почмагында бәләкәй генә радиоалгыч бар иде. Әлфия апа җырлаганын ишетсәм, тимер карават башына йөгереп менеп китә идем дә колагымны радиоалгычка куеп тыңлый идем, чөнки радиоалгычның тавышы күпме боргаласаң да, үзе кырыннан китми иде.

Аннан соң үсә төшкәч, 5-6 нчы классларда берничә сәгать укыганнан соң Әлфия апаның концертын карарга мәктәптән укучыларны клубка алып бардылар. Әлфия апа ап-ак күпереп торган итәкле капрон күлмәк киеп, “бээээээ, диләр, бэээээээээ, диләр, башка берсүз әйтмиләр”, дигән сүзләр кергән җырны җырлаганы һаман да күзалдында тора. Ул нинди җыр булгандыр, балалар өчен булгандыр инде сарык бәрәннәре турында.

Аннан җәй көннәрне клуб яннарында халыкка концерт куйганнары истә, анда әйтәләр иде инде, Әлфия апа балаларын да алып килгән икән дип. Безнең ул балаларны бик күрәсе килә иде. Без авыл балаларына андый Бөек кешенең балалары нинди икәне кызыксындыра иде.

Без бәләкәй чактан ук Әлфия апаның моңын аңлап, борылышларына кадәр игътибар итеп тыңлый идек.

Аның үлү хәбәре дә бик авыр тәэсир итте. Андый талантлар аз бит ул... Илһам Шакиров, Фәридә Кудашева......

Әлфия апаның авыр туфрагы җиңел булсын, искә алу сүзләре аңа дога булып барсын.

Аның җыры да, үзе дә сөйкемле иде.

Актаныш районы. Ләлә апагыз, 68 яшь.