Наилә Гыйбадуллина "Татарча диктант" акциясендә катнашты!

"Болгар радиосы" алып баручысы Наилә Гыйбадуллина Бөтендөнья "Татарча диктант" акциясендә катнашты. Ул Казанның медицина университетында диктант укыды. Диктантны студентлар гына түгел, табиблар да язган.



"Татарча диктант" акциясендә чит илдә яшәүче татарлар да катнашкан. Әйтик, Истанбул университетының әдәбият факультетында узган “Татарча диктант” акциясендә катнашучылар диктантны “бишле” һәм “дүртле” билгеләренә язган. Бу хакта Төркия яшьләре бүлеге вәкиле Айгөл Галиуллина хәбәр итә.

“Ике графикада яздылар: латин һәм кирилл. Күбесе кирилл әлифбасын белми. Диктант язарга азәрбайҗан, украин һәм төрек милләте кешеләре дә килде. Гомумән, бездә “дүртле” һәм “бишле”гә генә укучылар килгән икән, күбесе “бишле” билгесен алды. Егерме яшьтән алып, алтмыш яшькә кадәр утыздан артык кеше катнашты”, - диде ул.

Айгөл Галиуллина сүзләренчә, диктантны язучылар арасында текст бераз авырлык тудырган. “Кешеләр кайбер җөмләләрне авырлык белән язган. Әмма һәммәбезгә дә диктант язу ошады”, - ди ул.

Диктантта Газиз Мөхәммәтшинның “Саумысыз, аккошлар!” әсәре укылган. Текстны Айгөл Галиуллина үзе укыган. “Диктант язганнан соң җыелышып, табын артында чәйләр эчтек. Текстларны шунда ук тикшердек, хаталарны күрсәттек. Фикерләр алыштык”, - дип сөйләде ул.

("Татар-информ")