"Мин әни булдым!" бәйгесе җиңүчеләре бүләкләнде!

29 ноября 2018 "Болгар радиосы" яңалыклары

Бүген "Болгар радиосы"нда "Мин әни булдым!" конкурсында җиңүчеләр бүләкләнде.

Билгеле булганча, бәйгедә беренче урынга Түбән Камадан Рушания Габбасова лаек булды. Рушания ханымга "Болгар радиосы" VI Милли музыкаль премиясен тапшыру тантанасына чакыру бүләк ителде. Бәйгедә катнашкан Мамадыштан Алия Шәңгәрәева, Казаннан Раилә Каюмова, Азнакайдан Мәрзия Бүләкова, Ютазыдан Гөлфия Җәләевага Фәрит Мифтахов җитәкчелегендәге "Болгар" хәйрия фондыннан бүләкләр тапшырылды.

Моннан тыш, "Болгар радиосы" Инстаграмдагы бәйгедә җиңү яулаган тыңлаучыбызны да котлады. Казаннан Рамилә Закирова "Алтын йолдыз" сынының авырлыгын төгәл әйткән иде. Аңа Милли премия язуы төшерелгән мендәр бүләк ителде.

Килгән кунакларның татлы күчтәнәчләреннән авыз итеп, чәй эчү белән дәвам иткән очрашу "Болгар радиосы"ның йөрәге булган студиядә тәмамланды. "Болгар радиосы"ның баш мөхәррире-продюсеры Илфар Кәримов кунаклар белән истәлеккә фотога төште.