Милли музыкаль премиягә багышланган пресс-конференция узды

1 нче декабрь, "Татмедиа" үзәгендә V "Алтын йолдыз" "Болгар радиосы" Милли музыкаль премиясенә багышланган махсус пресс-конференция узды. Чарада зур тантананы оештыручылар белән бергә, музыкаль премиянең лауреат исеменә дәгъва кылучы җырчылар һәм музыкантлар да катнашты.

Пресс-конференциядә премиянең уздырылу һәм оештыру мәсьәләсенә кагылышлы сорауларга "Болгар радиосы" баш мөхәррире, зур тантананың алып баручысы Илфар Кәримов, сценарий авторы һәм режиссер Илфак Хафизов, "Болгар радиосы" директоры, тантананы оештыручыларның берсе Наилә Хәйдәрова җавап бирделәр.

Җырчылар арасыннан берничә "Алтын йолдыз" откан җырчы, Татарстанның һәм Россиянең халык артисты Венера Ганиева, узган елгы тантанада "Иң яхшы клип" номинациясендә җиңү яулаган Илсөя Бәдретдинова һәм "Алтын йолдыз" Милли музыкаль премиясенә әле беренче генә тапкыр дәгъва кылучы Илназ Баһ катнаштылар.

Бишенче премиянең төп яңалыгы булып, яңа номинацияләр кертелү санала. Яңалыкның берсе - "Иң яхшы аранжировщик" номинациясе. Быел әлеге бүләкне татар сәхнәсендәге күпчелек җырларны эшкәртүче белгеч Марат Мухин ала. Үзенең кичерешләре белән ул пресс-конференциядә бүлеште: "Яңа номинацияне бик кирәк дип саныйм. Безгә элегрәк игътибар аз булды яки бөтенләй булмады дияргә була. Милли музыкаль премиядә иң яхшы аранжировщикларны да бүләкли башлау моңа нокта куяр дип уйлыйм. Беренче номинациядә җиңү яулавыма чиксез шатмын".

Исегезгә төшерик, V "Алтын йолдыз" "Болгар радиосы" Милли музыкаль премиясе 9 нчы декабрь 18:00 сәгатьтә "Пирамида" концертлар залында уза.