Гөлназ Фәйзрахманова: "Яңа елга кергәндә, эшемә менә шундый зур бәя!"

«Болгар радиосы»нда «Нокта» тапшыруын алып баручы Гөлназ Фәйзрахманова ТР Массакүләм мәгълүмат чаралары өлкәсендәге күпьеллык нәтиҗәле хезмәте өчен Грамота белән бүләкләнде.

“Татмедиа” гаммәви коммуникация чаралары агентлыгы җитәкчесе Айрат Зарипов имзасы белән Грамота алдым! Шаккаттым, чөнки көтмәгән идем. Иҗат кешесе өчен дистә еллар эшләгән эшенең нәтиҗәсен күреп бәя бирү зур рәхәтлек бирә, ниндидер бер стимул. Бала чактан теләгән теләкләрем - радио-тв сөйләү, сәхнәдә эшләү, халыкка кирәкле тапшыру булдырып, файда китерү - болар бар да чынга ашты. Аллаһы Тәгаләгә рәхмәтлемен! “Татарстан Яңа гасыр” телерадиокомпаниясе, яраткан “Болгар радиосы”на , җитәкчеләребезгә, кулга- кул тотынышып эшләгән коллегаларыма рәхмәт! Яңа елга кергәндә, эшемә менә шундый зур бәя һәм нәтиҗә”, - дип хис-кичерешләре белән уртаклашты Гөлназ Фәйзрахманова.

Коллегабызны чын күңелдән котлыйбыз, эшендә зур уңышлар, яңа үрләр телибез!