"Болгар радиосы" ТР милли музеена "хәзинә" тапшырды.

Бүген 5-нче апрель көнне ТР миили музее үзенең туган көнен билгеләп үтә. Ә 1-5 апрель аралыгында "Тарихи ядкарьләр кабул итү көннәре" диеп исемләнгән уникаль акция узган иде. Шуны сәбәп итеп "Болгар радиосы" студиясенә "Шөпшә Шоу"га ТР миили музее хезмәткәрләре Руфия Мөхетдинова һәм Гүзәлия Җәләлова килделәр. Алар музей тарихы хакында һәм һәр елда да үткәрелеп килүче әлеге "Тарихи ядкарьләр кабул итү көннәре" акциясе турында сөйләделәр. Шушы көннәрдә теләгән һәркем музейга тарихи кыйммәткә ия диеп санаган төрле "хәзинә"не алып килә алган, ә инде бүген "Ачык ишекләр көнендә" битараф булмаганнар тапшырган экпонатлардан төзелгән күргәзмәне килгән кунаклар хозурына тапшырачаклар.  

Сүз уңаеннан, музей фондларында 800 000 саклау берәмлеге экспонат бар. Алар туган якның тарихын, табигатен, Идел буе, Урал алды, Русия һәм дөнья халыкларының тарихын өйрәнү һәм күрсәтү өчен файдаланыла. А.Ф. Лихачевның болгар тупланмасы, Ананьино казылмалары тупланмасы, мисыр һәм антик коллекцияләре, алтын тәңкәләр тупланмасы, XVII гасырның свиткалары, XV - XX гасыр кулъязма китаплары тупланмасы, татар әдәбияты вәкилләренең шәхси әйберләре, Казан татарларының декоратив-гамәли сәнгате үрнәкләре, Г.Р. Державинның мемориаль тупланмасы, тарихи таксидермия үрнәкләре тупланмасы, колибри тупланмасы, көнчыгыш нумизматикасы тупланмасы - игътибарга иң лаеклылардан.

"Болгар радиосы" да  "Тарихи ядкарьләр кабул итү көннәре" диеп исемләнгән уникаль акциядән читтә кала алмады. Радио хәзинәләре арасыннан раритет "Репортер 6"ны ТР милли музей фондына тапшырды. Кассеталы магнитафон рәвешендә булган әлеге репортер 4 кг авырлыкта 1970 елда Венгриядә эшләнеп чыгарылган. Шушы җайланмада махсус динамик компрессор да бар, шуңа да тавышны яздырган вакытта аерым көйләүләр таләп ителми. Әлеге репортерның аерым микрофоны да бар. "Репортер 6"ны 2 төрле вариантта эшләп чыгарганнар : 9,53 яисә 19,05 см/сек. тизлек белән. Кассета тасмасы 60 минутлык әңгәменә үз эченә сыйдыра алган.

 Шул кадәрле уңайлы булына карамастан, аның да үз җитешсезлекләре булган. Алар турында безгә "Болгар радиосы" корреспонденты Люция Рафаэловна Шәрәфиева сөйләде: 

"1990 елда Рәсәйнең беренче президенты Борис Ельцин Татарстанга эш сәфәре белән килде. Безне, журналистларны, аның белән очрашуга җибәрделәр. Интервьюны язып алыр өчен "Репортер 6"ны да алдык. Очрашу буласы җирдән безне 5 чакрым ераклыкта калдырдылар. Шул җайланманы асып барганда
 аның авырлыгын сиздем дә инде. Шулай ук репортердан кала һәрвакытта да өстәмә кассеталар ала идек. Чөнки кассета тасмасы күз карасыдай кадерле. Өзелсә, бетте баш! Бар эшең югала дигән сүз бит. Интервьюларны яздырып радиога кайткач та, икенче, репортердан да зуррак, катушкалы техникага яздырасың. Ә инде аннан соң гына эфирга тапшырасың".

Әлеге эскпонатны сезнең хозурыгызга да тәкъдим итәбез.