"Болгар радиосы" сайтында яңа конкурс башлана!

8 августа 2017 "Болгар радиосы" яңалыклары

"Болгар радиосы" тыңлаучыларын һәрдаим яңа конкурслар, бәйгеләр белән шатландырып тора. Билгеле, җиңүчеләрне дә буш кул белән калдырмый, ә затлы бүләкләр тапшыра. Шулай итеп, "Болгар радиосы" милли музыка премиясен тапшыру тантанасы якынлашкан вакытта рәсми сайтыбызда яңа фотобәйге старт алачак! Аның исеме дә "Мин + Йолдыз". Ни өченме? Чөнки "Болгар радиосы" милли музыка премиясе лауреатларын Йолдыз диеп атамый мөмкин түгел, алар халык, меңләгән тамашачылар тарафыннан сайланып алынган җырчылар.
"Мин+Йолдыз" бәйгесенең төп шарты - "Болгар радиосы" милли музыка премиясе лауреатлары, "Кайнар хит" тапшыруы катнашаучылары белән булган фотоларны "Болгар радиосы" электрон адресына юллау иде. Шактый күп эшләр килеп иреште, әмма, бәйге шартлары буенча, алар өчен тавыш бирү 14 нче август көнне генә башланачак һәм 15 нче сентябрьга кадәр дәвам итәчәк. Бер айдан соң без "Мин+ Йолдыз" бәйгесенең җиңүчесен ачыклыячакбыз.
Фотобәйгенең тавыш бирү вакыты максималь озын, төгәл 1 ай, бу исә катнашучыларның үтенече иде. "Болгар радиосы" һәр тыңлаучысының киңәшен, теләген ишетә һәм үти.
"Мин+Йолдыз" фотобәйгесендә катнашучыларның һәрберсенең дә җиңүче рәтендә булу мөмкинлеге бар, алда 30 көн көрәш көтә! Барчагызга да уңышлар!