"Болгар радиосы"нда яңа алып баручы - Лиана Марданова!

“Болгар радиосы”нда яңа алып баручы! Кастинг узу белән радиотыңлаучыларыбыз: "Кастинг узды, кемне алып баручы итеп сайладыгыз?" дигән сорауны еш кабатлады. Яңа алып баручыны без радиотыңлаучылар игътибарына бүген 18 июнь көнне тәкъдим итәбез! “Болгар радиосы”нда Лиана Марданованың беренче туры эфиры 18.00 сәг. башлана.

- Кастингта катнашырга нәрсә этәргеч булды?

Дуслар киңәш итте - минем күптәнге хыял икәнен беләләр иде. Ләкин мин иң соңгы көнгә кадәр суздым - төнге 10да гына аудиоязманы җибәрдем. Ниндидер «Ә алмасалар..» дигән курку бар иде.

- Өметләрең зурдан идеме?

Кастингның беренче турын уздың дип хәбәр иткәч үземне “Болгар радиосы” коллективында итеп хис иткән идем инде. Икенче турга килгәнче җиңәм, алалар дип йөрдем. Икенче турга килгәч егет-кызларны күрдем дә куркып калдым.. Алар миннән яхшырак кебек булды.

- Алып баручы буаларак чакыргач нинди хис-кичерешләр ?

Эчтә күбәләкләр оча диләр бит - шулай булды. Нык хыяллансам да - хыялның тормышка ашуын аңлау авыр бит ул. Шатландым әлбәттә. Башта әти-әниләргә әйтмәдем дә - Дилбәр белән эфирга чыккан көнне танышлар ишетеп хәбәр иткән.

- Нинди планнар белән янасың?

Планнар зурдан: яңа тапшыру, сәхифәләр булдырасым килә.

Лиана Марданова турында берничә кызыклы факт:

1. Үзеңне 3 сүз белән тасвирла.

Максатчан, тырыш Актаныш кызы

2. Яраткан ризыгың?

Әни пешергән бәлеш, әти кыздырган фаршлы токмач.

3. 5 еллык сәяхәткә үзең белән кем яисә нәрсә алыр идең?

Якыннардан кем теләк белдерә шуны ияртәм. Акча, телефон һәм зарядкасын, су.

4. Әлегә тормышка ашмаган хыялың?

Алар барысы да чынга ашып килә. Иң көткәне - танылган, тамашачы үз иткән алып баручы булу.

5. Янган йорттан беренче булып нәрсәне алып чыгар идең?

Документлар.

6. Көн саен эшләп тә, ялыктырмый торган шөгылең?

Ашарга пешерүдер мөгаен.

7. Бүгенге көндә нинди максат белән яшисең?

Бәхетле булу.

8. Син сайлыйсыңмы әллә сине сайлыйлармы?

Мин сайлыйм.

9. Син беркайчан да башкармаячак эш?

Белә торып кемгәдер зыян салмаячакмын.

10. Җитәкче була алыр идеңме?

Әйе.

11. Казаннан кала яшәү өчен тагын кайсы шәһәрне сайлар идең?

Миңа тынычрак урын кирәк - кайсы да булса шәһәр чите булса әйбәт.

12. Нәрсә дә булса өчен сиңа оятмы?

Бар инде алар. Ялгыш әйтелгән сүз, караш, гамәл..

Без яңа алып баручыбызга зурдан-зур уңышлар телибез! Төкле аягың белән, Лиана!