"Болгар радиосы" нда "Ак калфагым төшердем кулдан" спектакле премьерасы хакында сөйләштеләр.

Бүген 3 март иртәсен «Болгар радиосы» эфирында Россиянең атказанган, Татарстанның халык артисты, «Ак калфагым төшердем кулдан» спектаклендә төп рольне башкаручы Галиәсгар Камал исемендәге татар дәүләт академия театры артисты Рузия Мотыйгуллина белән каршыладык! 

Яз башында, бүген Рузия ханым Мотыйгуллина үзенең 67 нче туган көнен билгеләп үтә. Елмаеп кына торучы ханымга беренче караштан үз яшен биреп тә булмый,әйтерсең лә вакыт аны читләтеп узган, матурлыгына да, гүзәллегенә дә кагылмаган. «Болгар радиосы» алып баручысы Гөлназ Фәйзрахманова Рузия ханымны туган көне белән тәбрикләгәч тә:
«Мин туган көннәремне яратам. Аеруча да балачакта көтеп ала идем. Өйгә дус кызларымны ияртеп кайттым, әни шул вакытта бераз ачулана да торган иде. «Бүләк җыю өчен генә туган көнен ел да үткәрә» диеп әйтүләреннән курыкты. Мин бүген дә туган көннәремне көтеп алам, әмма бу елны 3 март эш көненә туры килү сәбәпле, бары кич кенә бәйрәм итәрбез» диеп сүзен төгәлләде Татарстанның халык артисты.
Билгеле, «Болгар радиосы» студиясенә килүнең төп сәбәбе ул - «Ак калфагым төшердем кулдан» спектакле премьерасы. Алып баручыбыз Гөлназ Фәйзрахманова бу темага да кагылмый булдыра алмады һәм роль, сценарий турында сорашты.
« Минем героиням чын коммунист хатын. Аның ире дә, улы да сугышта үлеп кала. Ләкин ул аларны кызганып еламый, ә киресенчә аларның батырларча һәлак булганнары белән горурлана. Әмма язмыштан узмыш юк – ана белән «һәлак булган» ул телевидениядә бер тапшыру кысаларында очрашалар. Билгеле, баласы сугыш кырында үлмәгән була, ә чит илгә китеп, яши башлаган. Калганын сөйләмим, алайса кызыгы калмый»
Шулай итеп , яхшы фильмны реклама чыгарылышы бүлгән кебек Рузия ханым да интриганы саклады һәм «Ак калфагым төшердем кулдан» спектакле премьерасына чакырып калды.

Сезнең өчен кечкенә генә фотоочет: