"Болгар радиосы" "Апанай" мәчетендә ифтар уздырды.

21 июня 2017 "Болгар радиосы" яңалыклары

Кичә "Болгар радиосы" хезмәткәрләре "Апанай" мәчетендә ифтар уздырды. Иң элек Нияз хәзрәт Сабиров килгәннәргә Коръән аятләрен укыды, соңрак Рамазан аены, ураза турында сөйләп үтте. Мөселманның бурычлары һәм аның тормыш кагыйдәләрен дә искә алды. Азан әйтелгәннән соң, барча килгәннәр намаз укыды.
Ифтар вакыты килеп җиткәч, мәчет картлары, "Болгар радиосы" хезмәткәрләре мул табыннар артына утырышты. Сөйләшү табын да артында да туктатылмады.Нияз хәзрәт килгәннәр белән дини темаларга аралашса, мәчет картлары "Апанай" мәчтенең тарихы турында сөйләде.
Инде бераз туклангач, табын артындагылар тәрәвих намазын укырга кузгалды.
Исегезгә төшербез, "Апанай" мәчете Иске Татар бистәсендә урнашкан. Ул Екатерина II Казанда патшабикә Анна Иоанновна боерыгы буенча җимерелгән һәм янган мәчетләр урынына, яңа ике таш мәчет төзергә рөхсәт биргәч, татар сәүдәгәре Якуп Солтангалиевның ярдәме белән 1768–1771 елларда төзелә.
Беренче вакытта мәчет бер заллы, сигез кырлы манаралы була. 1872 елда мигъмар П.И.Романов проекты буенча, мәчеткә төньяктан ике этажлы өстәмә бина кушыла, ул беренчел бина белән бер үк стильдә төзелә. 1882 елда мәчет тирәсендә кирпичтән койма эшләнә, анда бер этажлы лавка төзелә.
Апанай мәчете ТатҮБК Президиумының 1930 елның 6 февральдәге карары нигезендә ябыла. Совет чорында манара, мәчет залларының гөмбәзләре җимерелә, ә эчке як өч этажга бүленә. Декоратив элементларның күбесе юк ителә. Бинада балалар бакчасы урнаштырыла. 1995 елда ул «Мөхәммәдия» мәдрәсәсенә тапшырыла, реставрация эше башлана. Бүгенге көндә манара һәм эчке бүленеш төзәтелгән.

Яңалыклар исемлегенә кайтырга

Башка яңалыклар