14 апрель "Безнең авыл көе" җиңүчеләре бүләкләнәчәк!

Гыйнвар ахырында татар авылларын таныту һәм аларның тарихын мәңгеләштерү максатында “Болгар радиосы” “Безнең авыл көе” бәйгесен игълан итте.

Бәйге шартлары буенча катнашучы туган авылына багышланган җырны башкарып видеога яздырырга һәм аны #болгаравылкое хэштегы белән үзенең истаграмына урнаштырырга тиеш иде.

15 март видеоязмаларны кабул итү тукталды. Гомумән 200гә якын җыр килде. Катнашучылар арасында Татарстанлылар гына түгел - Пермь, Самара өлкәсе, Башкортстан, Мари-Эл республикасы әһелләре дә бар. Автор башкаручы җырлары да бихисап килгән. Иң күп видеоязма Арча ягыннан. Конкурсантларның күбесе милли киемнәрдә видео яздырып җибәргән.

«Болгар радиосы»ның сәнгать советы 200 видеоязма арасыннан 10 лидерны сайлап алды. Әлеге җырлар радионың инстаграм битенә урнаштырылды. Атна дәвамында инстаграм әбүнәчеләре бәйгедә катнашучылар өчен үз тавышын юллады. (5 меңнән артык тавыш җыелды)

22 март көнне җиңүчеләр дә билгеләнде:

1 урын - Арча районыннан Ильмира Заһидуллина ("Арча" җыры)- 1397 тавыш;
2 урын - Кама тамагы районы, Балтач авылыннан Эльза һәм Хәниф Гарифуллиннар ("Балтачым" җыры) - 764 тавыш;
3 урын - Самара өлкәсе, Камышлы районы, Балыклы авылыннан Линар Абсаттаров ("Камышлым" җыры) - 752 тавыш;

Бәйге шартлары буенча җиңүчеләрне акчалата бүләк көтә:

1 урын - 20 000 сум,
2 урын - 15 000 сум,
3 урын - 10 000 сум,

Җиңүчеләрне бүләкләү чарасы 14 апрель, 12.30 сәг. "Болгар радиосы" студиясендә узачак. Әлеге чарада “Татарстан Яңа Гасыр” телерадиокомпаниясе генераль директоры Илшат Әминов та катнашыр дип көтелә.

Сез дә кушылыгыз!