Токиода узарга тиешле Олимпия уеннары Кытай коронавирусы таралу сәбәпле, өзелү куркынычы астында

Быелның җәендә Токиода узарга тиешле Олимпия уеннары Кытай коронавирусы таралу сәбәпле, өзелү куркынычы астында. Daily Mailга мәгълүм булганча, турнирны ике елга күчеререргә мөмкиннәр.

Шул ук вакытта 2020нче елгы Олимпия уеннарының башкарма комитеты, турнир планлаштырылган срокларда — 24 июльдән 9 августка кадәр узачак, дип ышандырды. Шулай ук Европа футбол ассоциацияләре берлеге Кытай коронавирусы таралуга бәйле рәвештә, 2020нче елгы Европа чемпионатын күчерү яки гамәлдән чыгару мөмкинлегенә кагылышлы ашыгыч киңәшмә үткәрде.

Тhe Associated Press хәбәр иткәнчә, Бөтендөнья сәламәтлек саклау оешмасы УЕФАга киңәшләр биргән, алар нигезендә шәһәрләр, коронавирус йоктырган пациентларга ярдәм итү өчен кирәкле медицина базасы һәм җанатарлар белән хезмәттәшлек итү өчен тиешле инфраструктура булган очракта, турнир матчларын кабул итә алачак, дигән нәтиҗә ясалган.

Бүгенгә УЕФА Евро-2020нең планлаштырылган вакытка һәм трибуналарда җанатарлар каршында узачак вариант карый.