Төмән Сабан туенда җиңүләр буенча беренче урынны Тубыл алган

Төмәндә өлкә Сабан туенда төрле ярышларда җиңүләр саны буенча беренче урынны Тубыл районына биргәннәр. Шулай итеп, Сабан туе әләмен Тубыл районына тапшырганнар.  Бу турыда "Яңарыш" сайты хәбәр итте.

Төмәндә өлкә Сабан туе 23 июньдә Түбән Тәүде авылы читендәге аланда узган.
Бәйрәмгә килгән өлкә губернаторы вазифасын вакытлыча башкаручы Александр Моор һәм кунакларны милли киемдәге яшь егетләр һәм кызлар чәк-чәк белән каршылаган. Өлкә Сабан туе белән котлап Александр Моор өлкә татар милли-мәдәни автономиясе рәисе Ришад Зиганшинга концертлар оештырганда кирәкле җиһаз - яктылык техникасы алырга сертификат бүләк иткән.

Тәбрикләү өлешендә Төмән өлкәсе Диния нәзарәте рәисе, мөфти Зиннәт хәзрәт Садыйков, өлкә Думасы депутаты Юрий Конев, Түбән Тәүде район хакимияте башлыгы Валерий Борисов, Ришад Зиганшин, өлкә татар Конгрессы вәкиле Эльвира Арсланова чыгыш ясаган.

Сәхнәдән хезмәт батырларын һәм бәйгеләрдә җиңүчеләрне дә бүләкләгәннәр. Мәйданда балалар өчен аерым төрле бәйгеләр оештырылган.

"Кызганычка каршы, аларның да кайберләре түләүле булды. Ир-атлар үзләренең көчләрен, җитезлекләрен көрәш, гер күтәрү, кул көрәше, аркан тарту кебек ярышларда күрсәтә алган булсалар, хатын-кызлар өчен уеннар каралмаган булып чыкты", дип яза Рәүфә Кангазина "Яңарыш" сайтында.

Ат чабышында авыл һәм нәселле атлар арасында беренче урынга “Добытчик” (Төмән районы, атта йөрүче Павел Батраков) һәм “Флейта” (Юрга районы, Саян Яшкин) чыккан.

("Татар-информ")