Татарстан Президенты татар эстрадасы легендасы Илһам Шакиров белән хушлашырга киләчәк

Татарстан Президенты Рөстәм Миңнеханов Татарстанның халык артисты Илһам Шакиров белән хушлашу чарасында катнашачак. ТР Президенты белән бергә легендар мәдәният эшлеклесен соңгы юлга озатуда республика Премьер-министры Алексей Песошин да катнашачак. Бу хакта Казан Кремленең рәсми вәкиле Лилия Галимова хәбәр итте.

"Иртәгә сәгать 11дә опера театрында соңгы юлга озату чарасы булачак, анда Татарстан Президенты һәм Премьер-министр катнашачак. Әлбәттә, республика җитәкчелеге дә хушлашырга киләчәк", - диде Галимова.

"Илһам Шакиров татар халкы мәдәниятен үстерүгә зур өлеш керткән легендар шәхес һәм иртәгә хушлашырга килүче кешеләр саны, озату чарасына республика җитәкчелегенең килүе – болар барысы да әлеге шәхескә карата олы хөрмәт булуын дәлилли", – дип ассызыклады Казан Кремле вәкиле.

Илһам Шакиров чәршәмбе кичендә озак авырудан соң 84 яшендә вафат булды.

Татар эстрадасы легендасы белән хушлашу чарасы җомга көнне Казанда Муса Җәлил исемендәге Татар дәүләт опера һәм балет театрында узачак. Илһам Шакиров Яңа Бистәдәге татар зиратында җирләнәчәк.

("Татар-информ")