Ике күршене "Тамчы-шоу" акыл көче аша сынап карый

Киләсе "Тамчы-шоу" тапшыруында Питрәч һәм Лаеш районнарыннан килгән белемле укучылар көч сынаша. Тапкыр көндәшләр һәм якын күршеләр өчен уен башлангычы итеп ”Татарстан елгалары” темасы сайланган.

Мәктәп укучылары яратып катнаша торган "Тамчы-шоу" уен-викторинасы укучылар белемен тикшерүдә төпле үзәккә әверелде. Шәһәр һәм авыл мәктәбе укучылары үзләренең белемнәрен шушы белем көрәше мәйданында сыный алалар. Шоу-уенда катнашучылар – 6-8 нче сыйныф укучылары – география, әдәбият, сәнгать, татар мәдәнияте һәм тарихы буенча белемнәрен сыныйлар. Алар әле, шул исәптән, видеотабышмакны белергә, студиядә үк татар халкының берәр йоласын күрсәтергә тиеш. Капитаннар конкурсында ике якның җитәкчеләре үз командалары өчен өстәмә очколар яулый. Белемнәреннән кала, алар тапкырлыкларын да сынатмаска тиеш була.

Белем көрәшендә кемнәр җиңгәнен җомга көнне 15:15 сәгатьтә, якшәмбе 9:45 сәгатьтә "Татарстан-Яңа Гасыр", ә 9:55 сәгатьтә "ТНВ-Планета" телеканалларында "Тамчы-шоу" тапшыруын карап белә аласыз.