Татарстанда төп дәүләт имтиханын татар телендә 70ләп укучы бирәчәк

Татарстанда 9 сыйныфны тәмамлаганда төп дәүләт имтиханын татар телендә бирү турында 70ләп бала белдергән. 1275 укучы ирекле имтихан буларак татар теле һәм әдәбиятын сайлаган.

Бу хакта Татарстан мәгариф һәм фән министры урынбасары Илсур Һадиуллин журналистлар белән очрашуда белдерде.

"9 сыйныфны тәмамлаганда укучылар дүрт имтихан бирә: урыс теле, математика һәм тагын ике фән укучы теләге белән сайлана. Соңгы ике имтихан кысаларында татар теле фәнен сайларга була. Моңа беркем каршы килми", диде Һадиуллин.

Төп дәүләт имтиханын татар телендә бирергә Татарстанда 70ләп бала гариза тапшырган. 1275 бала татар теле һәм әдәбиятыннан имтихан бирәчәк.

Ә инде мәҗбүри рәвештә моңа кадәр уздырылып килгән дәүләт аттестациясе быел булмый. "Бишенче мәҗбүри имтихан баланың хокукларын бозу була, шуңа күрә быел аз гына үзгәрешләр кертелде. Белгәнегезчә, безне Рособрнадзор да, прокуратура да тикшерде", дип сөйләде министр урынбасары.
https://www.azatliq.org/a/29132626.html