Татарстанда томан вакытында саклык чараларын искә төшерәләр

Татарстан юлларында күз күреме начарланырга мөмкин. Бу турыда Татарстан Гидрометеорология һәм әйләнә-тирә мохитне күзәтү үзәге хәбәр итә.

Бүген кич, төнлә һәм иртәгә иртән Татарстанда урыны белән томан булырга мөмкин.

Татарстан Гражданнар оборонасы эшләре һәм гадәттән тыш хәлләр министрлыгы томан юлда йөрүчеләргә җитди куркыныч тудыруы турында кисәтә.

Автомобильчеләргә ерак сәфәрләрдән тыелырга кирәк. Транспортның техник торышына аерым игътибар бирергә кирәк. Хәрәкәт иткәндә, куркынычсыз тизлек сайларга, кискен маневр ясамаска, тормозга кисәк басмаска киңәш ителә.

Җәяүлеләргә ут кайтаргыч элементлы киемнәр киеп йөрергә, юл аша җәяүлеләр кичүе буенча гына чыгарга һәм хәрәкәт итүче транспорт алдыннан йөгереп чыкмаска кирәк.

("Татар-информ")