Татарстанда махсус санитар-эпидемиологик режим кертелә!

Татарстан Хөкүмәтенең күптән түгел Европа илләрендә эш сәфәрендә булып кайткан кайбер түрәләре карантинда. Бүген Татарстан Президентының матбугат хезмәте җитәкчесе Лилия Галимова  икътисад министры белән булган матбугат очрашуында шулай дип белдерде.

Ата-аналарга  язгы каникул чорында балалар белән чит илләргә чыкмаска киңәш итте. Республикада коронавирус уңаеннан 15 апрельгә кадәр махсус санитар-эпидемиологик режим кертелә.

Халыкара спорт чаралары вәзгыять яхшырганчы кичектерелә. Күп кеше катнаша торган чараларга да чикләү бар. Спорт матчлары тамашачылардан башка гына, онлайн режимда узачак.

Планлаштырылган мәдәни чаралар соңрак үткәреләчәк. Татарстан җитәкчелеге республикада яшәүчеләргә чит илләргә барудан тыелып торырга тәкъдим итә. Балалары белән ялга барырга  җыенган ата-аналарның сәфәрне чиктерүләрен сорыйлар. Предприятие, оешмадан эш буенча чил илдә булган кешеләрнең 14 көнгә карантинга китүе кирәк.

Бүген хөкүмәтнең Европа илләрендә булып кайткан кайбер түрәләре саклык чаралары күрә, алар карантинда. Короновирус очраклары булган җирләрдән кайткан кешеләрнең бу хакта Роспотребнадзор хезмәткәрләрнә хәбәр итүе сорала. Моның өчен республикада тәүлек буе кайнар элемтә эшли. Телефоны +7(843)296−02−24. Температура күтәрелсә, күкрәктә авырту булса, табибка мөрәҗәгать итәргә кирәк. Шулай ук  гади генә шәхси гигиена кагыйдәләрен үтәү: көн дәвамында кулларны юып тору, бүлмәләрне җилләтү, эш урынын чистартып тору зарур.