Татарстанда 26 градуска кадәр суытачак

Татарстан территориясендә кинәт суытты. Бүген аязган вакытта минималь һава температурасы -21..-26 градус фаразлана. Көндез максималь һава температурасы -9..-14, көнчыгыш районнарда -19 градус була. Юлларда бозлавык булырга мөмкин.

Салкын һава торышы кыска вакытлы булачак. Чәршәмбе, 29 гыйнварда, төнлә температура -12..-17 градус, көнчыгыш районнарда һәм аязган вакытта -18..-23 градус көтелә. Көндез -4..-9, көнчыгышта -12 градус булачак. Моннан тыш, аязучан болытлы һава торышы көтелә, кар, көндез урыны белән буран фаразлана.

Пәнҗешәмбе, 30 гыйнварда, төнге температура -6..-11, көнчыгыш районнарда һәм аязган вакытта -16, көндез 0..-5 градус булачак.

Җомга һәм шимбә, 31 гыйнварда һәм 1 февральдә, җылы һава торышы көтелә, урыны белән кар, җил көньяк-көнбатыштан була. Төнлә һава температурасы -2..-7, көндез 0..-5 градус тәшкил итә, дип хәбәр итә "Татар-информ".