Татарстан Президенты Дәүләт Советы утырышында катнаша
Бу минутларда бишенче чакырылыш ТР Дәүләт Советы депутатларының XXVI утырышы башланып китте. Анда ТР Президенты Рөстәм Миңнеханов, ТР Дәүләт Киңәшчесе Минтимер Шәймиев, республика Премьер-министры Илдар Халиков, Татарстанның барлык министрлары, ведомство җитәкчеләре һ.б. рәсми затлар катнаша.
Утырышта 31 мәсьәлә каралачак. Төп мәсьәләләрнең берсе - республика башкарма хакимияте органнарының 2016 елгы эшчәнлеге хакында хисап. Аның белән Илдар Халиков чыгыш ясаячак. Моннан тыш, “Татарстан Республикасының Сайлау кодексының 66 нчы матдәсенә үзгәреш кертү турында”гы 327-5 нче номерлы ТР закон проекты (I укылыш), “Гражданнарның торак хокукларын яклауны тәэмин итү турында”гы ТР законына үзгәрешләр кертү хакында”гы 325-5 нче номерлы ТР закон проекты (I укылыш), “Татарстан Республикасында җирле үзидарә турында”гы ТР законына үзгәрешләр кертү хакында”гы 325-5 нче номерлы ТР закон проекты (I укылыш), “Татарстан Республикасында урманнардан файдалану турында”гы ТР законының 3 нче матдәсенә үзгәрешләр кертү хакында” 319-5 нче номерлы ТР закон проекты (I укылыш) һ.б. закон проектлары бар. Шул исәптән, федераль дәрәҗәдәге закон проектлары да тикшерелә.
