Татарстан икътисад министры Артем Здунов: "Хакимият банкны саклап калу өчен зур эш алып бара."

Быелның 1 февраленә 132 меңләп Татфондбанк кертемчесе 42 миллиард 300 миллион сумнан артык акча алган, бу түләнергә тиешле барлык акчаларның 91,3 процентын тәшкил итә. Бу хакта Татфондбанк һәм ИнтехБанк кертемчеләренә иминият акчаларын кайтару буенча үткән чираттагы матбугат конференциясендә Татарстан икътисад министры Артем Здунов хәбәр итте. Интехбанк клиентларына 12 млрд сумнан артык акча түләнгән, бу исә барлык түләүләрнең 94,1 процентын тәшкил итә. Акчаларын 25 меңләп кертемче алган. Очрашу барышында министрдан ни өчен республика җитәкчелеге зыян күрүчеләр белән очрашырга теләми дип тә сорадылар. Здунов сүзләренчә, хакимият банкны саклап калу өчен зур эш алып бара. Зыян күрүчеләргә җитәкчелек белән очрашу мөһимме, әллә банкны саклап калумы,- диде министр. Шул ук вакытта ул кемнәр белән сөйләшүләр алып барылуын әйтмәде.