"Татарлар" тапшыруы "Татарстан-Яңа Гасыр" телеканалына әйләнеп кайта

Нәүрүз бәйрәмендә һәм көн белән төннең тигезләшкән көнендә "Татарлар" тапшыруы кабаттан "Татарстан-Яңа Гасыр" телеканалына әйләнеп кайта. Дөньякүләм сибелеп яшәгән милләттәшләребезнең тормышын чагылдырган тапшыру 21 нче мартттан телеканалда 18:00 сәгатьтә дүшәмбедән пәнҗешәмбегә чаклы күрсәтелә башлый.

Бүгенге көндә "Татарлар" - тамашачыларны бөтен татар дөньясында барган вакыйгалар белән таныштырып баручы тапшыру. Татар диаспорасы яңалыклары, яңа китапларның тәкъдир ителүләре, мәдәният, әдәбият, җәмәгать эшлеклеләренең тормышы, Россиядәге милли сәясәт торышына анализ, татар җыры фестивальләре, татар көрәше чемпионаты, Сабан туе кебек милли бәйрәмнәр - "Татарлар" тапшыруы татар халкы мәнфәгатьләрен чагылдырып, ил һәм дөньякүләм булган мәдәни-сәяси вакыйгаларны яктыртып бара. Бигрәк тә Татарстаннан читтә булган әһәмиятле вакыйгаларга өстенлек бирелә.

Хәзергә "Татарлар" милләттәшләребезне һәр эш көнендә "ТНВ-Планета" телеканалында сөендерә: 20:05 сәгатьтә - төп чыгарылыш, ә кабатлау 00:40 һәм 11:10 сәгатьләрдә күрсәтелә.