"Шундый җансыз кешеләргә исем китә": Илмира Нәгыймова хейтерларыннан СВОда һәлак булган энесенә кагылмауларын сорый

СВОда энесен югалткан җырчы Илмира Нәгыймова телеграм каналда хейтерларына мөрәҗәгать белән чыкты. Башта Руслан Кираметдинов белән аерылышканнан соң, аннан Марат Яруллин белән дуэт яздырганнан соң ишеп яуган каты сүзләргә дәшми торса да, энесенә әйтелгән ачы сүзләрдән читтә калмады.

"Шундый теманы күтәрәсе килә. Берсе язган: "әле энең үлде генә, ничек син Марат белән елмаеп йөрисең. Миңа калса аларның җаны урынына шайтан урнашкан. Алар фикеренчә, мин елмаерга да, яшәргә дә тиеш түгел, елап үләргә тиеш дигән сүз. 

Мин җырчы, минем эшем шул. Елап кына утрысам, тормышны алып барып булмый. Миңа балаларымны ашатырга, киендерергә, төрле түләүле түгәрәкләргә йөртергә кирәк. Мин елап утыра алмыйм. Шуңа күрә, бик авыр булса да, эшләргә тырышам. Эшем миңа көч бирә. Без гаиләдә биш баладан, икәү генә калдык. Мондый кайгыны Аллаһы Тәгалә беркемгә дә күрсәтмәсен! Башта Руслан, аннары Марат Яруллин белән "чәйнәдегез". Зинһар өчен энемә кагылмагыз! Эчемдә нәрсә булганын  үзем генә беләм", - дип сөйләде җырчы.