Шәймиев татарстанлыларга Ватан Геройлары көне уңаеннан мөрәҗәгать итте

Татарстанның беренче Президенты, ТР Дәүләт Киңәшчесе, Россиянең Хезмәт Герое Минтимер Шәймиев татарстанлыларны бүген билгеләп үтелә торган Ватан Геройлары көне белән котлады. Видеомөрәҗәгатьне республика Рәисе матбугат хезмәте бастырды.

"Кадерле татарстанлылар, хөрмәтле Ватан Геройлары! Ватан Геройлары көне илебезнең күпмилләтле халкы өчен аеруча истәлекле. Россиягә күп тапкырлар аның иминлегенә һәм бәйсезлегенә кул сузарга тырышкан дошманнарына каршы торырга туры килде. Безнең халык һәрвакыт бердәм булып туган җирне сугыш кырларында һәм тылда саклап калды, гаять зур батырлык һәм кыюлык күрсәтте.

Без алдагы буыннарның бөек батырлыкларын беләбез һәм хәтерлибез, Герой исеменә лаек булганнарның барысын да искә алабыз. Хәзерге заман чынбарлыгында бу бәйрәм үзенчәлекле мәгънә ала. Без илебезнең хәрби көче артуын, аның оборонасы ныгуын күрәбез.

Без Ватан Геройларының яңа буыны — илебез гаскәрләренең данлыклы патриотик һәм рухи-әхлакый традицияләрен лаеклы дәвам итүче махсус хәрби операциядә катнашучылар белән горурланабыз.

Барыбызны да Ватан Геройлары көне белән котлыйм. Безнең герой-ветераннарга сәламәтлек һәм иминлек, Ватанга тугры хезмәт итүче безнең көннәр геройларына көч һәм ныклык телим. Бәйрәм белән, кадерле иптәшләр!", - диелә мөрәҗәгатьтә.