Әсгать Сәфәров "Динамо" физкультура-спорт җәмгыятенә 100 ел тулу белән тәбрик итте

Татарстанның «Динамо» физкультура-спорт җәмгыятенә 100 ел. Юбилей белән котлау сүзләрен җәмгыятьнең рәисе, Татарстан Рәисе хакимияте җитәкчесе Әсгать Сәфәров җиткерә. "Динамо" - илдә беренчеләрдән булып оешкан спорт җәмгыяте. Ул төрле төрләрдә чыгыш ясаучыларны берләштереп халыкчан хәрәкәткә нигез салды. Татарстанда "Динамо" 1926 нчы елда, автономияле башка республикалардан алданрак оешып - маяк ролен үти. Үз тарихында 21 спортчысы олимпия чемпионы булды.

Хәзер Татарстандагы җәмгыять 25 мең кешене берләштерә, алар спортның 50 төре буенча шөгыльләнә, 200 ләбе төрле җыелма командаларга керә. Республика "Динамо"сының горурлыгы - чемпион булган коллективлар. Ирләр һәм хатын-кызлар волейбол командасы берничә мәртәбә Россия чемпионы булды, Россия кубогы һәм Суперкубогын яуладылар. "Динамо Ак Барс"ның уңышлары аерым казаныш. Чирәмдәге хоккей буенча ил чемпионатында 23 мәртәбә алтын медальгә ия булдылар.

Бүген Камал театрында юбилей датасына багышланган тантаналы чара узачак. Казанга илнең төрле төбәкләреннән Динамо җәмгыяте вәкилләре киләчәк.

Фото: rais.tatarstan.ru