Саба табибы «Иң зирәк Нечкәбил» номинациясендә җиңгән

Казанда республикакүләм «Нечкәбил» ана булу, матурлык һәм гаилә күркәмлеге конкурсы финалы узды. Бәйгедә республиканың иң гүзәл, иң булган 12 хатын-кызы катнашты. Төрле номинацияләрдә җиңүчеләр арасында Сабадан танылган табибә, гинеколог Рухсора ханым Худойбердыева да бар иде. Бу турыда район басмасы хәбәр итә.

Конкурс шартлары буенча һәр конкурсант үзенең гаилә кыйммәтләре белән уртаклашырга, гореф-гадәтләрен ачып бирергә, якыннары белән таныштырырга һәм сәхнә чыгышында үзенең җылы карашы, хатын-кыз зирәклеге белән булдырган гаилә матурлыгын күрсәтергә тиеш иде.

Сентябрь аенда ярымфиналга иллегә якын гаиләдән 12 кеше финалга чыккан.

«Чыгышымны „Яңа Ватаным“ дип атадык. 20 ел элек күп авырлыклар аша Таҗикстаннан гаиләм белән Татарстанга күченеп кайту, яңа нигез кору, монда үз кешегә әйләнүем, яраткан эшем, пациентларым, Байлар Сабасының үз төбәгемә әверелүе турындагы тормыш хикәясен 6 минутлык чыгышта ачып бирергә тырыштык. Бик матур, җылы, хисле килеп чыкты», — ди Рухсора ханым.

«Быел конкурсның унбишенче юбилей елы, шуңа да 12 катнашучыны да „Алтын Нечкәбил“ дип игълан итү турындагы карарга килдек», — диде жюри рәисе. Зал көчле алкышларга күмелде.

Рухсора Сәид кызына шулай ук «Иң зирәк Нечкәбил» номинациясе дипломы, кыйммәтле бүләкләр, шифаханәгә ике кешелек юллама да тапшырылды.

("Татар-информ")