Сөткә бәя төшә! Сыерны бетерәсеме? | Адымнар

Татарстанның сөт җитештерүчеләре чаң суга! Ел башыннан сөт хакын инде ике тапкыр төшергәннәр. Әле узган елның гыйнварында ул 47 сумны тәшкил итсә, хәзер 38 сум 70 тиенгә калган. Бер елда - 20 процент дигән сүз.

Шул ук вакытта сөтнең үзкыйммәте артып тора. Агрохолдинглар, хуҗалыклар, фермерлар - борчуын белдереп, Татарстанның сөт җитештерүчеләр берлегенә 50дән артык мөрәҗәгать юллаган. Алар, үз чиратында, проблеманы хәл итү юлларын табар өчен, авыл хуҗалыгы министрлыгына хат җибәрә.

Әлeге проблема бу атнада Мәскәүдә - сөтчелек Форумында күтәрелде. Анда билгеле булганча, узган ел Россиядә рекордлы - 34 млн тонна сөт җитештерелгән. Әмма сөтнең үзкыйммәте артуы, халыкның сөт ризыкларын азрак сатып ала башлавы, кибет киштәләрендә - читтән кертелгән продукциянең күп булуы - аның хакын уйната. Базардагы үзгәреш, беренче чиратта, илдә сөтне иң күп җитештерүче Татарстанга суга.

Бу вәзгыяттә сөт елгалары шаулап агырмы? Әллә инде инешкә әйләнерме? Рүзәл Шәрипов Республикада сөтне иң күп җитештерүче Әтнә районына барып, проблемага алдынгы хуҗалык күзлегеннән карады.