Рөстәм Минниханов изоляция кагыйдәләрен бозган өчен җаваплылыкны арттырды

Татарстан президенты Рөстәм Минниханов изоляция кагыйдәләрен бозган өчен җаваплылыкны арттырды. Хәзер андыйларны яңа маддә буенча җәзага тартырга мөмкиннәр.

Ул гадәттән тыш хәл яки аларның килеп чыгу куркынычы булганда, үз-үзеңне тоту тәртибен бозу, дип атала. Аның буенча административ штраф күләме 1 мең сумнан 30 мең сумга кадәр.

Президент бу маддә нигезендә протокол төзергә хокуклы вазифаи затлар исемлеген киңәйтте. Хәзер бу эш белән МЧС, экология, транспорт, хезмәт министрлыгы вәкилләре дә шөгыльләнәчә. Шулай ук күп кенә дәүләт комитетлары хезмәткәрләре дә административ эш кузгатырга хокуклы булачак.

Исегезгә төшерәбез, бүгенге мәгълүмат буенча, бер тәүлек эчендә Россиядә коронавирусның 954 яңа очрагы теркәлгән. Хәзер барлыгы 80 төбәктә 6 343 очрак теркәлгән. Иң зур сан Мәскәүдә - 4 484. Бер тәүлектә 2 кешенең гомере өзелгән. Барлыгы - 47.

Татарстанда короновирусның 16 яңа очрагы теркәлгән. Барысы да читтән китерелгән. Авыручылар Төркия, Франция, Мәскәү, Мәскәү өлкәсе, Израиль, Доминикана Республикасы, Гарәп Әмирлекләреннән кайткан. Бу хакта Президентның матбугат хезмәте башлыгы Лилия Галимова хәбәр итте.

11 кешенең авыруы җиңелчә формада үтә, 5 кешенең хәле уртача авырлыкта. Хәзер коронавирус ачыкланган кешеләр белән элемтәдә булган кешеләрне тикшерәләр.