Рөстәм Миңнеханов Ватан мәнфәгатьләренә хезмәт иткән һәркемгә рәхмәт белдерде

Кичә Казан Кремлендә РФ Конституциясенең 25 еллыгы уңаеннан Татарстан Президенты Рөстәм Миңнеханов исеменнән тантаналы кабул итү мәҗлесе узды, дип хәбәр итә республика башлыгы матбугат хезмәте.

«Россия Федерациясе Конституциясен кабул итү илнең көчле иҗтимагый үсешен тотрыклыландыруга ярдәм итте. Конституция икътисадый һәм сәяси системаның хокукый нигезләрен булдырды, гражданнарның төп хокукларын һәм ирекләрен игълан итте, дөньядагы иң яхшы тәҗрибәләрне үз эченә алды», — дип билгеләп үтте Рөстәм Миңнеханов үз чыгышында.

РФ субъектлары өчен Конституциянең федерализм нигезләрен булдыра торган, аларның статусын һәм вәкаләтләрен билгели торган нигезләмәләре мөһим, дип өстәде ул.

"Закон тарафыннан бирелгән киң хокукларга таянып, Татарстан икътисад һәм социаль өлкәне үстерүдә, барлык халыкларның мәдәниятен, милләтара һәм конфессияара татулыкны саклап калуда, гражданлык җәмгыяте институтларын үстерүдә сизелерлек уңышларга иреште. Болар барысы да республиканы яшәү һәм эшләү, туризм һәм инвестицияләр өчен җәлеп итә», - дип билгеләп үтте ТР Президенты.

«Без илебезнең барлык төбәкләре белән дустанә мөнәсәбәттә булуыбызга бик шат. Лидерыбыз — Россия Президенты Владимир Путинга безнең инициативаларга һәм проектларга һәрьяклап ярдәм күрсәткәне өчен рәхмәтлебез", - дип сүзен йомгаклады Рөстәм Миңнеханов.

("Татар-информ")