Рөстәм Миңнеханов Мисыр Президенты белән хезмәттәшлек турында фикер алышты

Татарстан Президенты Рөстәм Миңнеханов Мисыр Гарәп Республикасы Президенты Абдель Фәттах Ас-Сиси белән рәсми очрашты. Очрашу Каһирәдә “Аль-Иттихадия” сараенда узды. Бу хакта Татарстан Президентының матбугат хезмәте хәбәр итә.

Татарстан Президенты Мисырга чакырулары һәм кунакчыллык өчен ихластан рәхмәтен җиткерде.

“Татарстан эшлекле һәм мәдәни элемтәләрне үстерүдә ярдәм итәргә әзер. Безнең делегациянең Каһирәгә эшлекле сәфәре максаты - Россия – Мисыр багланышлары кысаларында икътисади хезмәттәшлекнең яңа мөмкинлекләрен өйрәнү”, - диде Рөстәм Миңнеханов. Ул кыскача гына Татарстан икътисады һәм инвестиция потенциалы белән таныштырды.

Рөстәм Миңнеханов Мисыр Президентына еллык “Россия – ислам дөньясы: “Kazan-Summit” Халыкара икътисади саммиты турында сөйләде. Ул Халыкара саммитның Россия һәм мөселман илләре арасында икътисади хезмәттәшлек итүдә нәтиҗәле мәйданга әйләнүен әйтте. Татарстан Президенты шулай ук соңгы ике елда саммит кысаларында “Россия – Мисыр” түгәрәк өстәле оештырылуын да әйтте. Рөстәм Миннеханов Мисырның төрле бизнес оешмаларын һәм делегацияләрен Татарстанга чакырды.

("Татар-информ")