Рөстәм Миңнеханов эш сәфәре белән Нью-Йоркта

Татарстан Президенты Рөстәм Миңнеханов эш сәфәре белән Нью-Йоркта. Килүгә үк, Республика лидеры Америка татарлары ассоциациясе әгъзалары белән очрашты. Хәзергә АКШта 3 мең 500ләп ватандашыбыз яши. Рөстәм Миңнеханов билгеләп үткәнчә, АКШка бу сәфәр Көнбатыш илләре, шул исәптән Америка белән багланышларны ныгытуда һәм үстерүдә чираттагы адым була.

Татарстан президенты хәбәр иткәнчә, ул еш кына Россия төбәкләрендә һәм чит илләрдә була, ватандашларыбыз белән аралаша. Аның сүзләренчә, мондый һәр очрашу аңарда горурлык хисе уята. Безнең ватандашларыбызның барлык халыклар белән дә тату-дус яшәве, конструктив мөнәсәбәтләр урнаштыра белүе һәм иң мөһиме – үз халкының гореф-гадәтләрен һәм телен саклап кала алуы – зур сөенеч, диде президент. Очрашуда Татарстан белән киләчәктә дә хезмәттәшлекне үстерү, республика һәм Бөтендөнья татар конгрессы Башкарма комитеты белән элемтәләрне ныгыту мәсьәләләре турында фикер алыштылар. Шулай ук бүген эш сәфәре кысаларында Республика лидеры Берләшкән Милләтләр Оешмасына бара һәм аның Генераль сәркатибе Антонио Гутерриш, шулай ук Россиянең БМО каршындагы Даими вәкиле Василий Небензя белән очрашачак.

("Яңалыклар" хезмәте)