Рөстәм Нәбиев казарма ишелгәндә һәлак булган егетләрнең әниләренең аңа янаганнары турында сөйләде

Бүген, 12 июльдә, Омск шәһәрендә казарма ишелгәнгә 8 ел булды. Бу куркыныч фаҗига 24 хәрби егетнең гомерен өзде. Анда безнең милләттәшебез, параспортчы, блогер Рөстәм Нәбиев тә зур зыян күрде: аның ике аягын ампутацияләделәр. Бу хәлләр тарих битләренең тузаны белән капланса да, аның йөрәкләрдә калдырган тирән эзе беркайчан да югалмаячак. Рөстәм Нәбиев телеграм-каналында 8 ел элек булган хәлләрне искә төшерә. «Мин исән калдым, ә 24 кеше – юк», - дип үзен бераз гаепле дә санаган Рөстәм. Блогер сөйләвенчә, һәлак булган хәрби егетләрнең әти-әниләре фаҗигадән соң аңа үлем теләгән. Әмма ул аларны гаепләми. «Аларның хәсрәте шундый зур, беркемгә дә мондый хисләрне кичерергә язмасын», - дип анлата Рөстәм. «Мин ничә ел шушы авыртуны йөрәгемдә йөртәм. Минем өчен Аллаһ Тәгалә барысын да хәл иткән иде. Ләкин акылым белән моны аңласам да, күңелдә барыбер авыр», - дип уртаклашты Рөстәм. Моны сөйләгәндә ул күз яшьләрен тыя алмады. Фото: t.me/rustamnabiev92 Источник: https://tnv.ru/tat/news/moguai/331722-r-st-m-n-biev-kazarma-ishelg-nd-lak-bulgan-egetl-rne-nil-rene-a-a-yanagannary-turynda-s-yl-de/