Карантинны бозучылар җинаять җаваплылыгына тартылачак

Эчке эшләр министрлыгы татарстанлыларга карантинны бозган өчен җинаять җаваплылыгы турында искә төшерде. Бу хактагы мәгълүмат ведомствоның рәсми сайтында чыкты.

Полиция режим буенча каралган нормаларны үтәмәүнең һәр очрагын күзәтәчәк һәм теркәп барачак. Эчке эшләр министрлыгы чит илләрдән кайтучылар үз-үзен изоляцияләргә тиешлеген искәртте. Бу гражданнар кайтулары турында Роспотребнадзорга хәбәр итәргә, 14 көн дәвамында өйдән чыкмаска, башка кешеләр белән аралашмаска, ә авыру билгеләре булган очракта өйгә табиб чакырырга тиеш.

Әгәр кагыйдәләрне бозу аркасында кешеләр күпләп авырый икән, гаепле кеше 80 мең сумга кадәр штрафка тартылырга, өч елга кадәр билгеле вазифаларны үтәү хокукыннан мәхрүм ителергә мөмкин. Шулай ук бер елга кадәр мәҗбүри яки төзәтү эшләренә җәлеп итү яки ирегеннән мәхрүм итү каралган.

Әгәр кагыйдәләрне бозу аркасында кеше гомере өзелсә, хокук бозучыга 480 сәгатькә кадәр мәҗбүри эш, ике елга кадәр төзәтү эшләре, биш елга кадәр мәҗбүри эшләр яки шул ук срокка ирегеннән мәхрүм итү яный.