ОТР федераль каналы ТНВны күрсәтә башлый!

2019 елның 29 ноябреннән “Россия Иҗтимагый телевидениесе” федераль каналы “Татарстан – Яңа Гасыр” телеканалын күрсәтә башлый. Бу хакта бүген Татмедиада узган матбугат конференциясендә “Татарстан – Яңа Гасыр” тедерадиокомпаниясенең генераль директоры Илшат Әминев хәбәр итте.

Аның әйтүенчә, ТНВны ОТР каналында иртәнге алтыдан сигезгә һәм кичке алтыдан җидегә кадәр карап булачак. ОТР каналы тугызынчы төймәдә күрсәтә.

Иртәнге сәгатьләрдә “Яңалыклар”, “Здравствуйте”, “Соотечественники”, кичке сәгатьләрдә “Черное озеро”, “Закон. Парламент. Общество”, ә ял көннәрендә “Каравай”, “Секреты татарской кухни”, “7 дней” тапшырулары эфирга чыгачак.

Илшат Әминев сүзләренчә, бүгенге көндә ТНВның ОТР белән хезмәттәшлегендә иң зур җитешсезлек – ул тапшыруларның бары тик рус телендә генә чыгуы. “Без милли компонентны кертү турында сөйләшүләр алып барабыз. Ә әлегә милли проблемаларны рус телендә күтәрәчәкбез”, - диде ул.

Әлегә ТНВ федераль каналга 3 сәгатькә генә чыга, киләчәктә аны 5 сәгатькә озайту күздә тотыла. Илшат Әминев иртәнге прайм таймны көндезге сәгать икегә кадәр, ә кичкесен сигезгә кадәр озайтырга ниятли. “Тик ул вакытта рус контентын үстерергә: интервью, ток-шоу, документаль тапшырулар өстендә эшләргә кирәк булачак”, - диде ул.