Мөслим имам-мөхтәсибе Габделкәрим хәзрәт Моратов фаҗигале рәвештә һәлак булган

Мөслим районы имам-мөхтәсибе Габделкәрим хәзрәт Моратов юл һәлакәтендә фаҗигале рәвештә үлгән. Татарстан Диния нәзарәте рәисенең урынбасары Мансур хәзрәт Җәләлетдин кайгы уртаклашу сүзләрен җиткергән.

"Бүген юл һәлакәтендә фаҗигале рәвештә хөрмәтле хәзрәтебез, коллегабыз, дустыбыз, Мөслим районының имам-мөхтәсибе Габделкәрим хәзрәт Моратов Аллаһ Тәгаләнең хозурына күчте. Бу кайгылы хәбәрне йөрәк сыкранып кабул итте. Ихлас күңелдән бу кайгыны хәзрәтнең туганнары белән уртаклашамын", - дип язган Мансур хәзрәт.

Ул бу фаҗиганең мөселман өммәте өчен зур югалту булуын язган.

"Аллаһ Тәгалә аның барасы урыннарын фирдәвес җәннәтләреннән насыйп итсен, бу дөньяда яшәгән вакытында булган ялгышлыкларын һәм гөнаһларын гафулардан иләсен. "Чынлыкта без барыбызда Аллаһ тәгаләнең хокемендә һәм бары тик Аңа гына кире кайтачакбыз". Аллаһ тәгалә кылган догаларыбызны кабул итсен", - дигән ул.

Имам-мөхтәсибнең алты улы булган. Аңа 36 яшь булган.

("Татар-информ")