Мәскәүдә Эдуард Успенский вафат булган

Мәскәүдә үз йортында 81нче яшендә язучы, драматург һәм сценарист Эдуард Успенский вафат булган. Бу хакта “Интерфакс” хәбәр итә.

Успенский соңгы елларда онкологик авыру белән көрәшкән.

Язучыга дан-шөһрәтне балалар өчен язылган “Крокодил Гена и его друзья” (1966), “Дядя Федор, пес и кот” (1974), “Гарантийные человечки” (1975) һәм башка китаплары, шулай ук шигырьләре китерде. Шулай ук ул күп кенә мультипликацион фильмнар сценариеләре авторы, шул исәптән үз китаплары буенча да. Алар арасында – Крокодил Гена һәм Чебурашка, Простоквашино, “Антошка” (1969), “Рыжий, рыжий, конопатый” (1971), “Дядюшка Ау” (1979), “Пластилиновая ворона” (1981), “Следствие ведут Колобки” (1986-1987) һәм башка мультфильмнар бар.
2010 елда Эдуард Успенский “Балалар әдәбиятында иҗади казанышлар өчен” номинациясендә Корней Чуковский исемендәге премия лауреаты була. Аның әсәрләре 25тән артык телгә тәрҗемә ителгән.

("Татар-информ")