Марат Әхмәтов: Яңгырлы һава торышы урып-җыю эшләренә комачаулый

Яңгырлы салкын һава торышы әлегә кыр эшләрен алып барырга мөмкинлек бирми, быел урып-җыю кампаниясе темплары 2018 елгыга караганда түбәнрәк. Бу турыда Татарстан Президенты матбугат хезмәте хәбәр итә.

Татарстан Премьер-министры урынбасары – авыл хуҗалыгы һәм азык-төлек министры Марат Әхмәтов Хөкүмәте Йортында узган киңәшмәдә әйткәнчә, бүгенгә бөртекле һәм кузаклы культуралар 88 мең гектардан (фаразланган мәйданнарның 6 проценты) җыеп алынган, 287 мең тонна ашлык суктырылган.

Бер гектардан уртача 32,7 центнер уңыш чыга. Шул ук вакытта көзге бодай чәчүлек мәйданнарының 19 процентыннан суктырылган, уртача уңыш – 34 ц/га, борчак 18 процент мәйданнан (24 ц/га), көзге арыш 9 проценттан (30 ц/га), арпа 5 проценттан (35 ц/га) җыеп алынган.

Узган елның шушы датасына республикада 214 мең га мәйданнан 643 мең тонна ашлык җыеп алынган, бер гектардан 30 центнер уңыш алынган. «Кайбер районнар июльнең өченче декадасы башында яхшы һава шартларыннан файдаланды һәм шактый мәйданнан уңыш җыйды», – диде Марат Әхмәтов.

Министр хәбәр иткәнчә, Нурлат районы 22 процент мәйданда 25 мең тонна ашлык суктырырга өлгергән, уртача уңыш 35 ц/га тәшкил иткән. Әлки районы аграрийлары 24 процент чәчүлекләрдән уңыш җыеп алган, әмма әлегә уңыш 26 ц/га булган.

Зәй районында бөртекле һәм кузаклы культуралар 7,2 мең гектардан (19 процент) җыелган. Зәй районы игенчеләренең иң югары уңышы – 46 ц/га диярлек. Районнарда бөртекле һәм кузаклы культуралар мәйданнарының 5 проценттан кимрәге суктырылган. Алар арасында Әлмәт, Түбән Кама, Яңа Чишмә, Чирмешән, Кама Тамагы районнары да бар.

("Татар-информ")