Әлфия Авзалова кызы Зөлфия ханым: "По блату" дип сөйләүчеләр күп булды ул

ТНВ каналында чыгучы "Әй, язмыш, язмыш" тапшыруында легендар җырчыбыз Әлфия Авзалова турында сөйләргә аның кызы Зөлфия Нигъмәтҗанова килгән иде. Зөлфия ханым "Әлфия Авзалова кызы" булуның никадәр рәхәт, шул кадәр авыр булуын да әйтеп китте. "Әлфия Авзалова кызы булу балачактан ук бик авыр. Без артист баласы, әни өйдә булмый иде. Әни 9 айдан ук гастрольләргә алуы, үзе җырлаган вакытларда гармунчыларга калдырып йоклатуы турында сөйләгәне истә. Үскәч тә әнине бик көттек инде, авыр булды. Укыганда "Сиңа рәхәт, Әлфия Авзалова кызы", - дип әйтәләр иде. Беләсезме, аннары театр училищесына кергәч, Марсель Хәкимович Сәлимҗанов төркеменә эләккәч, Наилә апа Гараева, Илдар абый Хәйруллин белән укыганда "по блату" керде дип әйтмиләр иде. Бик җитди уку булганга миңа анда гына "Әлфия апа кызы" дип әйтмәделәр. Эшли башлаганда да төрле сүзләр, көнчелек булды", - дип сөйләде Зөлфия ханым. "Мин әнием бөек җырчы дип балачактан ук горурлана идем, гәрчә барысын да соңрак аңласам да. Аның киенүенә, сәхнәдә үзен тотуына, тамашачылар белән уртак тел табуына шакката идем. "Минем әнием Әлфия Авзалова бит әл" дип горурлана идем", - дип уртаклашты ул.  Тапшыруны тулысынча биредә карый аласыз.